سوئٹزرلینڈ بھی امریکا اور اسرائیل کے ایران پر حملوں کو بین الاقوامی قانون کی خلاف ورزی قرار دینے لگا

اسپین اور جرمنی کے بعد سوئٹزرلینڈ نے بھی ایران پر امریکا اور اسرائیل کے حملوں کو بین الاقوامی قانون کی خلاف ورزی قرار دے دیا ہے۔

غیر ملکی خبر رساں ادارے کے مطابق سوئس وزیر دفاع مارٹن فِسٹر نے سوئس کابینہ کا حوالہ دیتے ہوئے ویکلی جریدہ زونٹاگز سائٹنگ کو بتایا کہ امریکا اور اسرائیل نے ایران پر فضائی حملہ کر کے بین الاقوامی قانون کو توڑا ہے۔

انہوں نے کہا کہ تمام فریقین کو فوری طور پر لڑائی بند کر دینی چاہیے تاکہ شہری آبادی کا تحفظ یقینی بنایا جا سکے۔

ایرانی صدر کا بیان: دباؤ بڑھا تو ردعمل بھی شدید ہوگا

سوئس وزیر دفاع کے مطابق فیڈرل کونسل کی رائے ہے کہ ایران پر حملہ بین الاقوامی قانون کی خلاف ورزی ہے۔

انہوں نے کہا کہ ہمارے نزدیک یہ تشدد کی ممانعت کے قانون کی خلاف ورزی ہے۔

مارٹن فِسٹر کا کہنا تھا کہ ان کی یہ بات ان تمام ممالک کے لیے ہے جو تشدد کی ممانعت کے اصول کی پاسداری نہیں کر رہے۔

انہوں نے واضح کیا کہ اس میں امریکا اور اسرائیل بھی شامل ہیں۔